"गझलोत्सवप्रतिष्ठानम्"

स्थापून ’प्रतिष्ठाना’, करतात सावकारी 
भरवून ’उत्सवाला’,  देतात ते ’सुपारी’

दरसाल भरविती हे ’साहित्य सेल’ मोठे
करण्यास नवकवींची पिळणूक छान सारी

लाचार पंडितांना फिरवोनिया सभोती
खंजीर खुपसती ते हळुवार,भर दुपारी

तळमळ कुठे दिसे ना काळीज भेदणारी
तरिही ’अम्ही स्वयंभू’ बोंबा खुशाल मारी

याने असे करावे,त्याने तसे करावे
जो ना करेल त्यांच्या हातात ये ’तुतारी’

संभाविताप्रमाणे देऊन उपाध्या ’त्या’
घेण्यास मस्त बदला करतात साठमारी

तोंडास ना कुणाच्या धरबंध राहिलेला
याची नजर विखारी,त्याचे विचार भारी

’कट्टा’च जो गझलचा,म्हणवोनि ’गझलरंग’
’यू ट्यूब’ वरिल शिर्षक चोरून डींग मारी

(’गझलरंग’ हे यू ट्यूब वरील एका 
जुन्या लोकप्रिय ’चॅनल’चे नाव आहे.)

अनुदान शासनाचे पाडून घेत पदरी
गझलेस देत आहे ते नवनवी उभारी

सुधाकर कदम