गझल

माझी मराठी गझल गायकी

मराठी गझल गायकीला तशी कोणतीही परंपरा नाही.माझ्या अगोदर मराठी गझल,गझलसारखी गाण्याचा फ़ारसा प्रयत्न कोणीच केला नसल्यामुळे मराठी गझल गाणे हे माझ्यासाठी आव्हान होते.मराठीमध्ये गझल जशी उर्दूकडून आली तशीच मराठी गझल गायकीही उर्दू गझल गायकांकडून उचलावी लागली.माझी गायकी किंवा ढंग हा पाकिस्तानचे मेहदी हसन,फ़रिदा खानम,गुलाम अली व आपले जगजीत सिंग ह्यांच्या गायकीवरुन तयार झाला आहे.त्या काळात विदर्भातील यवतमाळ जिल्ह्यातील आर्णी सारख्या आडवळणी गावात वरील गायकांच्या ध्वनिमुद्रिका सुध्दा मिळत नव्हत्या.पाकिस्तान रेडिओवरुन जे काही ऐकायला मिळायचे त्यावरुन मला जेवढे शिकता येईल तेवढे शिकत गेलो.पुढे स्व.सुरेश भटांनी मला मेहदी हसन,फ़रीदा खानम, यांच्या ध्वनिफ़िती दिल्या.हळूहळू गुलाम अली,जगजीत सिंग,बेगम अख्तर यांच्याही गायकीचा अभ्यास करुन मी माझा वेगळा असा बाज निर्माण केला. (पृष्ठ क्रमांक क्लिक केल्यास एक- एक पृष्ठ आपल्याला वाचता येईल)

पृष्ठ क्र.



Friday, July 12, 2013

आनंदगाणे...



शहरी वस्तीला
बाजूला ठेवोनी
निसर्ग बघावा
खेड्यात जावोनी

काळीशार शेते
पोपटी होऊनी
ओंजळीत सुख
देई आनंदुनी

गिरक्या घेवोनी
भिरभिरणारा
पाठ्शिवणीचा
खेळ खेळे वारा

हिरव्या डोहात
सरकत्या वाटा
जलतरंगाच्या
सरगमी लाटा

खुसखुसणारे
सळसळे रान
दाटसर पिक
अंगास लेवून

उभ्या जोंधळ्याला
मारोनोया मिठी
गुदगुल्या करी
द्वाड बरबटी

रानफूल रोपे
येई टरारून
तुर्रेदार टोप्या
डोई चढवून

सनोसळ्या राती
मन माळावरी
हलकी झुळूक
गाई दरबारी

अवखळ पाने
अंग घुसळून
वार्‍याच्या तालात
करीती नर्तन

अवघं लाघव
हिरवं तुडुंब
द्यावी वाटे तेथे
मनालाही डूब

भरल्या शेताचं
दर्शन घडता
सृष्टीपुढे झुके
आपसूक माथा


सुधाकर कदम 




संगीत आणि साहित्य :