बेवडेबाज मित्रांनो...खास तुमच्याकरिता...............

होळी...

रंगुनी रंगात 
आली नवी होळी
घालोनी काचोळी 
बिकीनीची....

चोहिकडे चाले
होळीला जल्लोष
रंगांचा हा मास
पचरंगी...

पुर्वी फाल्गुनात
येत असे होळी
आता बोंब हाळी
बारोमास...

सालभरी चाले 
होळी न शिमगा
काय नवल गा 
लाथाळीचे...

निवडणुकीत 
रंगांचीच मस्ती
उमेदवार कुस्ती 
खेळतसे...

निळी पिचकारी
भगव्याच्या संग
करी अंग संग
आनंदाने...

रंगालाही धर्म
असतो कळले
म्हणोनि पिवळे
पितांबर....

जाती व धर्माची
ठिगळं ठागळं
लावोनिया काळ
सोकावतो...

वावरात रोज
रंगपंचमीच
पोटरीला बोच
रक्तवर्णी...

कदम बाबांचे 
एकच सांगणे
लावू नका बेणे 
विकृतीचे...

सुधाकर कदम

बिरज में धूम मची है आज...

खरा हिरो…

सध्याच्या युगाचा 
खरा हिरो कोण ?
दिसे समोरून 
मिडियाच…

बाबा रामदेव 
अण्णाजी हजारे
माध्यमांचे तारे 
वर्षभरी…

राजकाण्यांना 
शिव्यांची लाखोली 
वाहोनि आपुली 
खाज काढी…

मुजोर उद्धट 
अर्धे हळकुंड 
बनलेत पुंड 
यांचेमुळे…

वाहिन्यांचे लक्ष 
TRP वरती 
व्यावसायिक दृष्टी 
ठेवोनिया…

जाहिराती द्वारे 
पैसा कमावणं
हाच दृष्टीकोन 
माध्यमांचा…

कोवळ्या मनात 
विखार पेरून 
सत्तेचा सोपान 
चढू पाहे…

वातावरणात 
दांभिकपणाच 
फाजील श्रद्धेचं 
स्तोम दिसे…

जाहिरातींमध्ये 
मस्तवाल दृष्ये 
टाकती सहर्षे 
पैशासाठी...

गरमा गरम 
दृष्ये ही पाहून 
लैंगिक शिक्षण 
मिळतसे...?

नवसंस्कृतीचा 
असे हा विकास 
आपण मागास 
ठरतसे...

मोडीत काढाया 
राज्यघटनेला 
निघाला काफिला 
आपलाच…

निवृत्त वरीष्ठ 
नोकरशहांचा 
आणि माध्यमांचा 
खेळ सारा…

सुधाकर कदम

जेव्हा मनुष्य कोणत्याही कारणामुळे का होईना,पण स्वतःचा दृष्टीकोन तपासून पाहतो आणि त्याची हडसून-खडसून चिकित्सा करतो,तेव्हाच त्यात बदल होतो...

डॉ.अल्बर्ट एलिस